NWK het R150 000 vir dié projek beskikbaar gestel en produsente gevra om asseblief ’n ton of meer graan of oliesade te skenk en só ’n verskil te maak. Deelname aan die projek is natuurlik vrywillig. Skenkings word teen NWK se rekening vir Agri Waardeketting Verligtingsprojek gelewer en gestoor, waarna dit deur Botselo Mills in Delareyville tot mieliemeel verwerk is.
Die Suid-Afrikaanse Vrouefederasie (SAVF) Noordwes het die verspreiding van die mieliemeel onder behoeftige gemeenskappe in NWK se bedieningsgebied in Noordwes hanteer. Die gemeenskappe wat gebaat het by dié projek is Bakerville, Blydeville, Buhrmansdrif, Grasfontein, Graslaagte, Lichtenburg, Mareetsane, Thlabologang en Welverdiend.
Teen einde Augustus is daar reeds meer as 31 ton by NWK se silo’s gelewer. Hiervan is 23,48 ton deur Botselo Mills verwerk na 1 643 sakkies (16,43 ton) mieliemeel waarvan 1 607 sakkies reeds oorhandig is.
NWK bedank al die vrygewige produsente vir hul skenkings wat gehelp het om honger te verlig in 1 144 huishoudings en ook by die volgende ouetehuise: SAVF Lichthuis, SAVF Zeerust, Coligny Najaarsrus, Huis Lou van Wyk Sannieshof, Huis Delareyville, Koster tehuis vir bejaardes, SAVF Kosmos Coligny en SAVF Rodeonhof Swartruggens.
