Lichtenburg Dierewelsyn se waterprobleme is iets van die verlede danksy talle rolspelers, waaronder NWK, wat saamgestaan het om ’n boorgat hier te sink en ’n tenk
op te rig.
Muriel Poole, ’n vrywilliger by dié organisasie, het vertel dat hulle sedert Januarie 2023 ’n ernstige watertekort ervaar het. “Ons moes smeek vir water, maar gelukkig het ondernemings soos OK Foods telkens tot ons redding gekom en water kom aflewer,” het sy gesê.
Die organisasie versorg 45 honde en 55 katte en het water nodig – nie net vir die diere om te gebruik nie, maar ook om hulle komberse te was en hokke skoon te hou. Lichtenburg Dierewelsyn gebruik sowat 1 000 liter water per dag vir dié doeleindes en die situasie het onuithoudbaar geraak.
’n Pleidooi is in die plaaslike koerant, Noordwester, gerig en diereliefhebbers het vinnig gehoor gegee. Pieter van der Hoff, ’n produsent van die Gerdau-omgewing, het water naby aan die dierewelsyn se perseel uitgewys en ’n boorgat is gesink.
NWK het ’n watertenk (5 250 liter) ter waarde van R4 650 geskenk, wat opgerig is om die water in te berg. Agrico het ’n pomp geskenk en geïnstalleer. Die welsyn kan nou selfs te midde van grootskaalse kragonderbrekings, wat Lichtenburg nog gereeld teister, water vir sy werksaamhede aanwend.
“Veral tydens intense hittegolwe, soos wat ons in November en Desember ervaar het, kan ons dalk nog sonder elektrisiteit klaarkom, maar nie sonder water nie,” het Muriel gesê. “Ons is baie dankbaar teenoor almal wat gehelp het om hierdie droom ’n werklikheid te maak.”
