Dekades se diens by NWK erken en vereer

Leon Venter (Barberspan Silo), Jan Morakabe (NWK Retail Lichtenburg) en Alvin Wilson (Graanverhandeling) het 35 jaar diens aan NWK gewy. Alvin tree ook aan die einde van November af.

Anel Roode (Ondersteuningsdienste), Kurt Niehr (Silo 3 in Lichtenburg), Pienkie Baloyi (Bodenstein Silo), Derik Oberholzer (Finansiering), Chris Smit (Grootpan Silo), Willie Jansen (Derby Silo), Tienie Manders (Risiko- en Besigheidsintelligensie) en David Kgomane (Creations@NWK) is vereer vir 25 jaar se diens aan NWK.

Dennis Coetzee, uitvoerende groepbestuurder van Mensekapitaal by NWK, het hulle by ʼn intieme geleentheid by NWK se opleidingsentrum toegespreek. “Julle het deur dik en dun julle lewens gewy aan die voortgesette groei, innovasie en vooruitgang van ons organisasie,” het hy hulle verwelkom.

“Vandag gaan oor meer as om bloot julle jare van diens te erken, maar ook die lojaliteit, verbintenis en voortdurende strewe wat julle geopenbaar het om ons te help om die vele uitdagings en oorwinnings te navigeer.”

Dennis het gesê dat hulle bydraes, beide professioneel en as individue, die organisasie se kultuur help vorm het. “Dit weg die baan na sukses vir toekomstige werknemers. Deur julle volharding en onwrikbare toewyding, het julle nie net persoonlike sukses behaal nie, maar julle kollegas geïnspireer om hoër te mik.”

Hy het gesê dat NWK elkeen se unieke rol wat hulle tydens hul loopbane vervul het, opreg waardeer. “Deur jarelange diens te vier, erken ons dat ons waardevolste bate ons werknemers is. Mag julle voortgaan om ander met julle toegewydheid, uithouvermoë en bydraes te inspireer.”

Hulle toekennings is deur Pieter Kleingeld, groephoof- finansiële beampte van NWK oorhandig. Benedict Modise (direkteur van ekonomiese ontwikkeling by NWK) het as seremoniemeester opgetree.

Joseph Dintwe (Halfpad Silo, 25 jaar), Jannie Rousseau (Finansiering, 35 jaar) en Elize Labuschagne (Inligtingstegnologie, 35 jaar) was afwesig.